Tanınmış türk jurnalist, köşə yazarı Fatih Altaylı iştirak etdiyi verilişdə Türkiyə millisinin baş məşqçisi Fatih Terimi çox sərt tənqid edib.

Axar.az xəbər verir ki, Avro-2016-da mübarizəni qrup mərhələsində dayandıran Türkiyə yığmasını tənqid edən Altaylı ağır ifadələr işlədib. O, xüsusən Fatih Terimin davranışlarını tənqid edib və onu təhqir etməkdən belə çəkinməyib:

"Avro-2016-nın ən pis komandası Türkiyə millisidir. Türkiyə xalqı da məğlubiyyətlərə görə yox, komandanın pis oynamasına görə futbolçuları tənqid edir. Mən baş məşqçisindən tutmuş, futbolçusuna qədər - bunlara tab gətirə bilmərəm. Kimsən axı sən? Rədd ol get! İldə 2-3 milyon alırlar, ancaq bunun haqqını vermirlər. "Türk xalqından üzr istəyirəm, biz bu işi bacarmadıq, yaxşı oynaya bilmədik, istefa verirəm", - desələr, biz də başa düşərik. Ancaq bunlar daha da lovğalanırlar. Davamlı olaraq adamı təhdid edirlər. Sən kimsən axı? Aya raket yollayırsınız, şərəfsizlər? Yenə deyirəm, bacarmadıq desələr, bunu anlayışla qarşılayarıq, ancaq bunlar adamı təhdid edirlər. Siz kimsiniz axı? Rədd olun gedin!"

Qeyd edək ki, Türkiyə millisi Avro-2016-da mübarizəni dayandırandan sonra istər mətbuatda, istərsə də sosial şəbəkələrdə baş məşqçi Fatih Terim və futbolçular sərt şəkildə tənqid olunur.