Ana səhifə İqtisadiyyat |
Böyük Britaniyanın neft-qaz nəhəngi BP-nin Azərbaycan qolu "BP-Azerbaijan" kütləvi ixtisarlara start vermək ərəfəsindədir.
Axar.az-ın əldə etdiyi məlumata görə, şirkət işçilərin 15 faizini ixtisar etmək niyyətindədir. Dünya bazarında neftin sürətlə ucuzlaşması şirkətin gəlirlərinin kəskin şəkildə aşağı düşməsinə səbəb olub. Məlumatlı mənbənin sözlərinə görə, məhz bu səbəbdən şirkət bir çox islahatlara əl atıb. Bunlardan biri də işçilərin kütləvi ixtisarıdır.
Bildirək ki, "BP-Azərbaycan" şirkətində 2013-cü ilin statistikasına görə, daimi işə götürülən şəxslərin sayı 3254 nəfərdir. Bunların 2760-ı (84 faiz) Azərbaycan vətəndaşıdır. İxtisarlar davam edərsə, şirkətin qəbul etdiyi, 2018-ci ilədək azərbaycanlı işçilərin say nisbətinin 80 faizə çatdırılma prosesi də dayanmış olacaq.
Xatırladaq ki, BP Azərbaycanda 1992-ci ildən fəaliyyət göstərir. Əsas hüquqi şəxs "BP Eksploreyşn Limited" (BP Exploration (Caspian Sea) Limited) şirkətidir.
Şirkət əsasən Çıraq platforması, Mərkəzi Azəri platforması, Qərbi Azəri platforması, Şərqi Azəri platforması, Şahdəniz platformasi, Dərinsulu Günəşli platforması və Qərbi Çıraq platformasında fəaliyyət göstərir.
BP-Azərbaycan 1995-ci ildən bəri AÇG, BTC, ŞD və CQBK layihələri üçün təxminən 43,1 milyard dollar xərcləyib.
Tarix
2014.12.08 / 16:53
|
Müəllif
Şəmsəddin Ənsar
|