"Rublun kursunun oynaqlığı Rusiya ilə ticarət aparan biznes adamlarının və şirkətlərin dayanıqlı və uzunmüddətli iş əmsalına maneə olur".

Bu sözləri Axar.az-a açıqlamasında rublun məzənnəsinin qalxıb-enməsi və bunun Azərbaycana ola biləcək mümkün təsirlərindən danışarkən iqtisadçı ekspert Natiq Cəfərli deyib:

"Rublun kursu hər gün dəyişir, demək olar ki, sabah və axşam kursları arasında da fərq var. Buna görə də iş adamları hər bir biznes müqaviləsi üzrə Rusiya ilə işləyərkən bunu nəzərə alırlar. Yəni onlar rublun daha da ucuzlaşacağı ilə bağlı gözləntiləri qiymətin üzərinə gəlmək məcburiyyətində qalırlar ki, sonradan dolların məzənnəsi qalxdıqda bu əməliyyatdan uduzmasınlar. Rusiyanın Avropa və Amerika kənd təsərrüfatı məhsullarına embarqosu üzündən Azərbaycandan bu ölkəyə ixracın artacağı gözlənilirdi. Görünən odur ki, kursun oynaqlığı azərbaycanlı fermerlərin Rusiyada iş görmək həvəsini öldürüb. Bu da öz növbəsində Azərbaycandan bu ölkəyə ixrac olunan məhsulların həcminin azalması ilə nəticələnib. İkinci bir təsir isə orada yaşayan azərbaycanlılarla bağlıdır ki, bu, Rusiyadan gələn gəlirlər hesabına dolanan ailələrin sosial vəziyyətini daha da pisləşdirəcək".

İqtisadçı ekspert Vüqar Bayramov isə rublun oynamasının daha çox Azərbaycanın idxal və ixracına təsir göstərdiyi qənaətindədir.

Onun sözlərinə görə, bu dəyişiklik xüsusən fermerlərin işini çətinləşdirir:

"Rublun məzənnə itirməsinin Azərbaycanda kənd təsərrüfatına ciddi təsiri gözlənilir. Rubl gün-gündən məzənnə itirdikcə, bu, Rusiyada istehsal olunan məhsulların ucuzlaşmasına, eyni zamanda, Rusiyadan daha çox məhsulun idxalına gətirib çıxaracaq. Hətta praktik olaraq artıq Azərbaycan bazarında Rusiya mallarının payı artıb. Bu baxımdan istər azərbaycanlı iş adamları üçün, istərsə də Rusiyada yaşayan azərbaycanlılar üçün rublun məzənnəsinin möhkəmlənməsi və ölkə iqtisadiyyatının stabilləşməsi daha məqsədəuyğundur. Bu, eyni zamanda daha geniş imkanlar deməkdir".

Sözügedən məsələ ilə bağlı Milli Məclisin İqtisadi siyasət daimi komitəsinin üzvü, millət vəkili Vahid Əhmədov də baş verən bu kəskin dəyişikliyin Azərbaycana təsirsiz ötüşməyəcəyini bildirib:

"Bu, ilk olaraq, Rusiyada yaşayan soydaşlarmızın işini çətinləşdirəcək. Əgər rubl iki dəfə dəyərdən düşürsə, demək, bu ölkədən Azərbaycana göndərilən vəsaitlərin həcmi də iki dəfə azalacaq. İkincisi, oraya göndərilən malların dəyərinə təsir göstərəcək. Belə ki, qiymətlərdə azalmalar olacaq. Bu, daha çox Rusiyada yaşayan soydaşlarımızın əmək haqlarını və gəlirlərini ciddi şəkildə azaldacaq".