Rusiyada yaşanan iqtisadi böhran avtomobil sektorunu iflic edib.

Axar.az məlumat verir ki, ötən ay aparılan hesablamalara görə, 2014-cü ilin eyni dövrü ilə müqayisədə avtomobil satışı 37,9 faiz geriləyib. Ötən ilin fevralında 206 min avtomobil satılmışdısa, cari ilin eyni dövründə bu rəqəm 128.298-ə düşüb.

Yanvar ayında aparılan sorğu nəticəsində isə eyni dövrlə müqayisədə 24,4 faiz geriləmə müşahidə olunmuşdu.

Ekspertlər isə qarşıdan gələn dövrü Rusiya avtomobil bazarı üçün ən pis dövr kimi xarakterizə edir. Çətinliklərin önümüzdəki aylarda ən pik həddə çatacağı gözlənilir.

Xatırladaq ki, AEB Avtomobil Sənaye Komissiyası 2015-ci ildə avtomobil satışında 24 faiz geriləmə olacağını proqnozlaşdırıb. Komissiyanın gözləntilərinə görə, cari ildə Rusiyada 1,89 milyon avtomobil satılacaq.

Ayrı-ayrı firmalara gəlincə, fevral ayında "Şevrolet"in (Chevrolet) satışı 74 faiz azalaraq 3255-ə, "Ford" 78 faiz azalaraq 1399-a, "Opel" 86 faiz azalaraq 912-yə, "Citroen" 83 faiz azalaraq 380-ə, "Pejo" (Peugeot) 84 faiz azalaraq 377-ə, "Honda"nın satışı isə 90 faiz azalaraq 252-yə enib.

Nə qədər qəribə olsa da, bahalı avtomobillərin satışında artım müşahidə olunur. Məsələn, fevral ayında "Porşe"nin (Porche) satışı 119 faiz artaraq 381-ə, "Leksus" (Lexus) 11 faiz artaraq 791-ə, "Mersedes-Benz" 18 faiz artaraq 4151-ə, BMV satışları isə 6 faiz artaraq 3550-yə çatıb.

Ekspertlərin fikrincə, Rusiya avtomobil sektorunun yenidən özünə gəlməsi 2019-2020-ci illərə təsadüf edəcək.