ABŞ iqtisadiyyatı ilə bağlı müsbət statistik məlumatlar bu dəfə də dollara əlavə dəstək verdi və dünya valyutası bahalaşmağa başladı.

Axar.az xəbər verir ki, bu barədə iqtisadçı ekspert Samir Əliyev açıqlama verib. O, hesab edir ki, dolların bahalaşmasını Avropa Mərkəzi Bankının depozit faizlərini azaltmaq və kəmiyyət yumşaldılması proqramını (ayda 60 milyard avro miqdarında pul çapı) artırmaq niyyəti də stimullaşdırdı:

"Dünyada dollar əsas valyutalara münasibətdə möhkəmlənir. Azərbaycanda da artıq dollar 1,051 manat həddinə kimi bahalaşıb. İnsanlarda bununla bağlı gərginlik yaranıb və hamı bunu üzən məzənnəyə keçid kimi qiymətləndirir. Hökumət üzən məzənnəyə keçmək niyyətini elan edib. Ancaq Azərbaycanda yaxın dövrlərdə bu, mümkün deyil. Çünki onun fəsadları ağır ola bilər. Dolların bugünki bahalaşmasını heç də üzən məzənnəyə keçid kimi qiymətləndirmək olmaz. Əvvala, bunu Mərkəzi Bank əvvəlcədən elan etməlidir. İkincisi, üzən məzənnəyə keçidin baş verməsi manatın əhəmiyyətli ucuzlaşmasına gətirib çıxara bilər. Bugünki ucuzlaşmanı isə sırf texniki hesab etmək olar. Çünki manatın məzənnəsi fiksə olunmuş şəkildə MB tərəfindən müəyyən olunur. Hazırkı bahalaşmanı yumşaq devalvasiya hesab etmək olmaz. Nəzərə alaq ki, söhbət hər 100 dollara bir neçə qəpik bahalaşmadan gedir. Ola bilsin, MB sabah dolları yenidən ucuzlaşdırsın. Yəni bunu yumşaq devalvasiya ilə əlaqələndirmək tezdir".