Dünəndən sanki böyük arzular qabağında kiçildim, balacalaşdım və lap körpə vaxtlarıma qayıtdım. O vaxta ki, iməkləyirdim, yerimək arzusundaydım: yeridim; məktəb arzusundaydim - ilk dərs ilində məktəbli forması geyindim məktəbli oldum, orta məktəb şagirdi oldum; institut oxumaq arzusunda oldum - çox əziyyətlər çəkdim bəhrəsini gördüm və tələbə adını qazandım... Nəhayət ev-ailə sahibi olmaq arzusundaydım və şükür Allaha, bu arzuya da çatdım.

Keçən il anamı insult vurdu. Xəbəri eşidən kimi qohum-qardaş yığışıb dərhal kəndə getdik. Anamı görəndə hər şey yadımdan çıxdı. Ağzı əyilib qulağının yanına çatmışdı və danışanda çox çətinlik çəkirdi. Kənd yerində şəraitin olmamasına görə tez Bakıya xəstəxanaya gətirmək istədim. Amma həkimlər ona silkələnmək və tərpənməyi qadağan etmişdi. Aparacağımız təqdirdə palçıqlı, kələ-kötürlü, sürüşkən yollarda onu itirəcəyimi bildirdilər.

Çox fikirləşdim.

Yalnız vertolyotla aparmaq olardı, o imkan nəinki məndə, heç cümlə kəndimizdə yox idi. Əgər yollar asfalt olsaydı, təcili yardım maşını ilə anamı istədiyim xəstəxanaya götürə bilərdim.

Onda fikirləşdim ki, mənim arzularım çox kiçik və hər bir kəsin həyata keçirə biləcəyi arzularmış.

Yol arzuları, bütövlük arzuları, sərhəd arzuları, xalqına və dövlətinə məğrurluq və qəhrəmanlıq salnamələri yazdırma kimi işlər böyük arzulardır və o arzuları həyata keçirmək dahi insanların qismətinə yazılır.

Rayonumuzun hər bir kəndinə yol çəkilməsinin iştirakçısı və şahidi olmaq hər bir sakinimizin qeyd etdiyim böyük arzularındandır. Kəndə yolum düşən və düşməyən zamanlarda bu arzumu gerçəkləşdirmək istəsəm də, imkanlarımız buna yol vermirdi.

Noyabrın birində axşam dayı oğlundan mesaj aldım: "Təbrik edirəm, yolunuz mübarək".

- Nə yol, nə təbrik?

- Xəbərin yoxdu? Bütün saytlar verib.

Nə yazıq ki, cənab prezidentin bizim üçün ən önəmli sərəncamı adminın gözündən qaçmışdı. O sərəncam kasıb və əzab-əziyyətlə yaşayan minlərlə insanın arzusuydu, illərlə gözlədiyi röyasıydı.

•••

İlham Əliyev Lerik Xanəgah yolunun çəkilişinin başa çatdırılması üçün vəsait ayrılması haqqında sərəncam imzaladı. Bir il bundan qabaq ayrılan vəsait tam yolsuzluq şəraitində yaşayan kəndlərə bəs etməmişdi və yol yarımçıq qalmışdı. Çox böyük iqtisadi çətinliklərlə üz-üzə qaldığımız vaxtda verilən bu sərəncam ölkə başçısının ən ucqar kəndlərdə yaşayan vətəndaşına böyük diqqət və qayğının təcəssümüdür.

Sevincimizin həddi-hüdudu yoxdur. Nə dünən, nə də bu gün sevincdən yata bilmişəm.

Bu hal məndə dövlətimiz müstəqillik qazananda, Mübariz İbrahimov erməni postlarını təkbaşına darmadağın edəndə, Aprel döyüşlərində olmuşdu.

Cənab Prezidentimiz İlham Əliyevə necə təşəkkür edim, bilmirəm.

İki gündür həm də bunu düşünürəm...

"Millətinsəsi.az" saytının baş redaktoru Talıb Əhədov