Qazaxıstan Prezidenti Nursultan Nazarbayev "Möhtəşəm Yüz il" ruhlu tarixi filmlərin çəkilməsi ilə əlaqədar "Qazaxfilm"ə göstəriş verib.

Axar.az Businessnews.kz-ə istinadən xəbər verir ki, bu barədə Alma-Atı şəhərinin meri Əhmədcan Yesimov məlumat verib. Onun sözlərinə görə, türk serialı kimi tarixi kino-epopeyanın çəkilməsini Nazarbayev Alma-Atı şəhərində keçirilən beynəlxalq Avrasiya kinofestivalının açılışında çıxışı zamanı deyib:

"Mən dünən dövlət başçısı ilə danışdım. Söhbətimiz dünya miqyaslı epoxal lentlərin ərsəyə gəlməsindən getdi. Məsələn, prezidentimiz qeyd etdi ki, qazaxların əksəriyyəti böyük maraqla "Möhtəşəm Yüz il" türk serialına baxırlar. Bu səbəbdən də "Qazaxfilm"ə göstəriş verdi ki, Janibek və Kerey qazax xanlarından başlayaraq, ölkəmizin digər tarixi qəhrəmanları haqqında filmlər çəkilsin".

Yesimov xatırladıb ki, bu layihələrin ərsəyə gəlməsi üçün ölkəsində kifayət sayda peşəkar ssenarist və rejissor var.