Axar.az-ın budəfəki qonaqları şou-biznesin yeni duet ortaqları Səidə Dadaşova və bəstəkar-müğənni Ramal Əsədzadədir.

Aralarında sevgi var...

- Deyilənə görə, Səidə Dadaşovayla Ramal Əsədzadə arasında sevgi yaşanır…

Səidə: - Biz layihəyə başlayanda bilirdik ki, duet ərsəyə gəldikdən sonra bizə veriləcək ilk suallardan biri də bu olacaq. Bu sualın verilməsi normal haldır, bütün dünya praktikasından da görürük ki, hər hansı bir xanımla əks cins nümayəndəsi duet oxuyursa, demək, "aralarında sevgi var" kimi sözlər deyilir. Bizim aramızda sadəcə dostluq var.

Ramal: - Mən demirəm sənət adamları pisdir, amma şəxsən mən müğənni xanımla sevgili olmaram!
- Duet oxumaq kimin ağlına gəldi? Təklif kim tərəfdən oldu?

Ramal: - Bu yay yatdım, yuxuda gördüm ki, Rəşid Behbudov adına Mahnı Teatrında Səidəylə duet oxuyuruq. Təbii ki, yuxudur deyib keçdim və heç bir addım atmadım. Aradan bir ay keçdikdən sonra təkrar olaraq eyni yuxunu yenə gördüm və bu barədə Səidənin prodüserinə dedim.

Səidə: - Mən bu haqda eşidəndə düşünmədən "hə" dedim, çünki Ramal çox istedadlı müğənnidir.

- Ramal, "müğənni xanımla sevgili olmaram" dediniz. Səbəb?

- İlk növbədə qısqanclıq. Həddindən artıq qısqanc insanam. Razı olmaram ki, sevgilim kimlərinsə qarşısında çıxış eləsin və kimlərinsə sevgisini qazansın. Mənim sevgilimin başqalarının sevgisinə ehtiyacı olmamalıdır. İncəsənət adamlarının, əsas da xanımların şəxsi həyatları bir az qəribə olur. Açıq-saçıqlığı qəbul edə bilmərəm!

Toylara dəvət edirlər...

- Səidə xanım, bu duet ortaqlığından razı qaldınızmı?

- Əlbəttə, çox razı qaldım və ən əsası Ramal kimi özümə dost tapdım. Artıq bizi Ramalla tədbirlərə və toylara bir dəvət edirlər.

Şou-biznesimiz çox bərbad durumdadır...

- Bu mahnıya klip çəkdirməyi planlaşdırırsınız?

Ramal: - Bəli, fevral ayının axırlarına planımızda var. Maraqlı və fərqli bir klip istəyirik, media işçiləri üçün də təqdimat keçirəcəyik.

- Ramal, deyirlər ki, özündən çox razıssınız...

- İnsan övladına lovğalıq yaraşmır. Yeri-göyü yaradan Allahdır və Quran oxuyanda görürük ki, Allah "mənəm-mənəm" demir, bəndə kimdir ki, desin?! Sadəcə, mən səsimə və özümə inandığım üçün adımı özündənrazı qoyublar!

- Şou-biznesimiz hansı səviyyədədir?

Ramal: - Şou-biznesimiz çox bərbad durumdadır, çünki səsi olan müğənni çox azdır. Səsi olmayan çıxıb efirdə özünü reklam edir və insanlar efirdə görüb, onu toya dəvət edir. Nəticədə isə həmin müğənnilər toyu bərbad vəziyyətdə idarə edirlər. Yaxşı sənətçilərimiz də var ki, reklam olunmasa belə, gözəl səsə malikdir.
Səidə: - Səsi olan da, olmayan da oxuyur, bu haqda heç danışmaq istəmirəm.

- Səsi olmayanlar kimlərdir?

Ramal: - O qədər... Ad çəkib həmin şəxsləri reklam etmək istəmirəm!

Səidə: - Yaxşı müğənni olmaq üçün ilk növbədə səs, görünüş və musiqi təhsili olmalıdır.