Azərbaycan Respublikası Mədəniyyət və Turizm Nazirliyinin sifarişi ilə C.Cabbarlı adına "Azərbaycanfilm" kinostudiyasında lentə alınan "Əsgərin şücaəti" bədii filminin çəkilişləri yekunlaşıb.

Axar.az xəbər verir ki, çəkilişləri Belarusiyada və Azərbaycanda aparılan yeni ekran əsəri 1941-ci ildə əfsanəvi Brest qalasında döyüşən və 50 il sonra Qarabağ müharibəsində yenidən əlinə silah alan əsgərdən bəhs edir.

Dram janrında çəkilən filmin üzərində azərbaycanlı və belarusiyalı kinematoqrafçılardan ibarət heyət çalışır. Ekran əsərinin ssenari müəllifləri Yavər Rzayev və Konstantin Vorobyov, quruluşçu rejissoru Elxan Cəfərov, quruluşçu operatoru Nadir Mehdiyev, quruluşçu rəssamı Rafiq Nəsirov, bəstəkarı Polad Bülbüloğlü, icraçı prodüseri Azər Quliyev, prodüseri Müşfiq Hətəmovdur.

Filmdə baş rolları Şamil Süleymanov, Bəhruz Vaqifoğlu, Gülzar Qurbanova, Qurban İsmayılov, Georgi Caara, Mixail Kaminski, Aleksandr Pavlov, İvan Matskeviç və digərləri canlandırırlar.