Ana səhifə Kult |
Bildiyiniz, oxuduğunuz və eşitdiyiniz kimi, "Titanik" gəmisi 103 il əvvəl – 1912-ci ilin bu günü İngiltərədən yola çıxıb. Bu barədə çox araşdırma aparılıb, hətta sənədli film də çəkilib. Gəminin taleyi ilə bağlı maraqlı faktlardan biri də yaxın keçmişdə məlum olub - "Titanik"ə Fransadan minməyi planlaşdıran türk Bəsim Ömər Paşa limana gedəcəyi qatara gecikməklə faciədən xilas olub.
Aylıq tarix və mədəniyyət jurnalı olan "Yeddiqitə" son sayında "Titanik faciəsi"ndən xilas olan Osmanlı paşası həkim Bəsim Ömərin həyatını yazıb. Türkiyənin ilk qadın doğum mütəxəssisi həkim Bəsim Ömər Paşa 1912-ci ilin may ayında ABŞ-ın paytaxtı Vaşinqtonda keçiriləcək Qızıl Xaç konfransına qatılmaq üçün İstanbuldan bir ay əvvəl yola çıxıb. Parisə çatan Bəsim Ömər 10 aprel 1912-ci ildə İngiltərədən yola çıxaraq Nyu Yorka gedəcək "Titanik" gəmisində özünə yer ayırtdırıb. "Titanik"in ilk dayanacağı Fransanın Çerburq şəhərinə qatarla getməyi planlaşdıran Bəsim Ömər otelin işçisindən onu erkəndən oyandırmasını istəyib. Ancaq otelin səlahiyyətli işçisi Bəsim Ömər Paşanı oyandırmağı unudur və qatar yola düşür.
Çerburqda yeni səfər üçün gözləyən Bəsim Ömər Paşa 5 gün sonra gələn xəbərlə sarsılır. Özünün də bilet aldığı "Titanik" gəmisi aysberqə çırpılaraq batmış və 1514 adam həyatını itirmişdi.
Dünyanın ən bəxtəvəri
Dənizçilik tarixinin ən böyük fəlakətindən xilas olan Dr. Bəsim Ömər bu hadisədən sonra başqa bir gəmiylə Vaşinqtona çatıb və konfransda Osmanlı İmperatorluğunu təmsil edib. O, sonralar bu hadisəyə görə "Yer üzünün ən bəxtiyar insanı mənəm", – deyirmiş.
Türk tibbinin qabaqcılı
Osmanlının son dövrlərinin ən əhəmiyyətli təbiblərindən hesab olunan Dr. Bəsim Ömər Türkiyənin ilk qadın doğum mütəxəssisidir. Müasir ginekologiya sayəsində qabaqcıllardan biri olan Bəsim Ömər 1892-ci ildə Türkiyənin ilk qadın doğum klinikasını da yaradıb. Qızılay klinikasını yenidən fəal hala gətirmək üçün də çalışan Bəsim Ömər Türkiyədə mamalıq, tibb bacısı və xəstə baxıcılığı peşələrində islahatlar aparıb. Çanaqqala Müharibəsi zamanı Qızılayın müdiri olub. Türkiyənin ilk qadın həkimlərinin yetişməsində Bəsim Ömərin böyük rolu var. Uşaq Əsirgəmə Təşkilatını da quran Bəsim Ömər 400-dən çox elmi məqalə, 70-dən çox kitab yazıb. 1940-cı ildə Ankarada vəfat edən Bəsim Ömər "Titanik"dən sağ çıxsa da, ikinci dəfə "bəxtəvər" olub əcəlin əlindən çıxa bilmədi.
Tarix
2015.04.10 / 22:30
|
Müəllif
Nigar An
|