Azərbaycanın xalq şairi Səməd Vurğunun ev muzeyində "Səməd Vurğun mükafat"ının təqdimat mərasimi keçirilib.

Gənc Tamaşaçılar Teatrının Mətbuat xidmətindən Axar.az-a verilən məlumata görə, teatrın direktoru və baş redaktoru "Səməd Vurğun mükafatı"na layiq görülüblər.

Mərasimdə ədəbiyyat və mədəniyyət xadimləri, incəsənət ustaları, vurğunsevərlər iştirak ediblər. Səməd Vurğununun şəxsiyyəti və yaradıcılığına olan tükənməz sevgisinə, şairin ev muzeyində keçirilən tədbirlərə dəstəyinə görə Azərbaycan Dövlət Gənc Tamaşaçılar Teatrının direktoru, Azərbaycan Respublikasının əməkdar artisti, Kalmıkiya Respublikasının əməkdar incəsənət xadimi Mübariz Həmidov, şairin irsinin təbliği sahəsindəki əvəzsiz xidmətlərinə görə teatrın baş redaktoru, əməkdar mədəniyyət işçisi Səriyyə İsmayılova sözügedən mükafata layiq görülüblər.

Qeyd edək ki, Səməd Vurğun mükafatının təsis edilməsinin əsas məqsədi ədəbi irsimizin öyrənilməsi, ədəbiyyat tariximizin araşdırılması və Səməd Vurğun poeziyasının incəliklərinin üzə çıxarılmasıdır.