Hollandiyalı rəssam Vinsent Van Qoqun "L`Allee des Alyscamps" (Aliskamp alleyi) adlı əsəri Nyu Yorkdakı hərracda 66 milyon 300 min dollara satılıb.

Axar.az xəbər verir ki, "Sothebi Hərrac Evi"ndə təşkil edilən auksionda satılan "L`Allee des Alyscamps" əsəri hərracda satılan ən bahalı rəsm əsəri olub. Van Qoqun 1888-ci ildə Fransanın Arles şəhərində çəkdiyi yağlı boya rəsmində payız təsvir edilib.

Nyu Yorkdakı hərracda fransız rəssam Kloud Monetin 1905-ci ildə yağlı boya ilə çəkdiyi bir rəsm əsəri isə 45 milyon dollara qoyulsa da, 54 milyon dollara alıcı tapıb. Nilufərlərin təsvir edildiyi əsər gecənin ən yüksək qiymətə satılan ikinci parçası olub.

Hərracda isveçrəli rəssam Alberto Qiakomettinin 1956-cı ildə Parisdə hazırladığı, qardaşı Dieqonun kiçik bürünc heykəli də 12 milyon 800 min dollara satılıb. Nyu York hərracında asiyalı alıcıların sıxlığı diqqət çəkib.

Xatırladaq ki, Van Qoqun ən yüksək qiymətə satılan əsəri 1990-cı ildə "Doktor Qaçetin portreti" ("Portrait of Dr. Gachet") adlı rəsmi olub. Bu şəkil 82 milyon 500 min dollara satılıb.