"Təsadüfi adamlara seriallar həvalə olunanda onlar müəyyən elementləri çox yaxşı işləsə də, bütövlükdə ideyanı əks etdirməkdə çətinlik çəkirlər".

Bu sözləri teletənqidçi, professor Qulu Məhərrəmli milli seriallarımızda milli-mənəvi dəyərlərin qorunub-saxlanması və təbliği haqda Axar.az-a danışarkən deyib.

"Əgər söhbət milli seriallardan gedirsə, bunlarda təbii ki, müəyyən bir ideya və dünyagörüşü təbliğ olunmalıdır. Amma indiki halda seriallara yalnız maarifçi missiyanı həvalə etmək doğru deyil. Bəli, seriallar müəyyən dəyərləri təbliğ etməlidir. Biz serialları, filmləri niyə çəkirik? İndiyə qədər bizdə mövcud olan həm orijinal ssenari əsasında, həm bədii ədəbiyyat nümunələri əsasında çəkilən serialların əsas məqsədi tarixi dəyərləri, keçmiş münasibətləri formalaşdırmaq, tamaşaçılara müəyyən estetik zövq vermək olub. Bunların hamısı vacib nüanslardır. Məncə, bu seriallar haqda Təvəkkül bəyin (Təvəkkül Dadaşov. – red.) dediyi fikirlər doğrudur, amma kifayət qədər gecikmiş bəyanatdır. Seriallara bu tələbi lap əvvəldən qoymaq lazım idi. Prezident 10 milyondan çox vəsait ayırıb, müxtəlif seriallar çəkilib. Doğrudur, bunların içində bir az babatları da var, amma seriallar Azərbaycan həyatına zidd olan situasiyaları əks etdirməməlidir. Ekranda sanki bir kriminallaşma gedir, kriminallaşmanı həyat tərzi kimi təqdim etmək meyli var. Olmayan şeylər bizə bədii nümunə kimi təqdim olunur. Bu baxımdan o sözlərdə həqiqət var ki, bəli, seriallarımızın aydın missiyası olmalıdır. Onlar milli dəyərləri təbliğ etməlidir. Kino peşəkar rejissorların köməyi ilə ekranlaşdırılmalıdır. Yaxşı düşünülmüş ədəbi ssenarilərin köməyi ilə dəyərlərimiz təbliğ olunmalıdır. Kinonun gücü rejissor işində və peşəkarlıqdadır. Mütəxəssislər olmasa, yaxşı ədəbi ssenari olmasa, yaxşı serial çəkmək mümkünsüzdür. Buna görə də bu işlə peşəkarlar məşğul olmalıdır. Mənim lap əvvəldən də mövqeyim budur ki, bu işi kinostudiya icra etməlidir. Təsadüfi adamlara seriallar həvalə olunanda onlar müəyyən elementləri çox yaxşı işləsə də, bütövlükdə ideyanı əks etdirməkdə çətinlik çəkirlər. Hər işin öz ustası var və bu işlə peşəkarlar məşğul olmalıdır".

Xatırladaq ki, Milli Televiziya və Radio Şurasının (MTRŞ) Ekspertiza, proqramlaşdırma və analitik şöbəsinin müdiri Təvəkkül Dadaşov "Report"a açıqlamasında komediya janrında çəkilən müasir serialların milli-mənəvi dəyərlərimizə zidd olduğunu və narazılıq doğurduğunu açıqlayıb.