Film təzə çıxanda mən nə aktyor, nə də peşəkar idim. Film mənə çox yaxşı təsir bağışlamışdı. Mövzu elə bil, həyatdan götürülüb.

Axar.az xəbər verir ki, bu sözləri xalq artisti Tariyel Qasımov "Filmin sonu" verilişində "Ögey ana" filmi haqda danışarkən deyib. O, filmdəki İsmayıl rolunun tarixçəsi haqda da maraqlı faktı açıqlayıb:

"İsmayıl rolunda çəkilmək üçün başqa bir uşaq da gətirmişdilər. O uşaq rejissor Həbib İsmayılovun qohumu idi. Amma siz rejissorun böyüklüyünə baxın ki, o, qohumunu yox, başqa bir uşağı – Ceyhun Mirzəyevi seçdi. Bax, rejissorun böyüklüyü ondadır ki, o, hər rola uyğun adamı seçib.

Oradakı rollara baxaq: Həqiqət Rzayeva qayınananı çox gözəl canlandırır. Ceyhun özü uşaq ola-ola professional bir aktyor kimi oynayır. Fateh Fətullayev, Ələsgər Ələkbərov, Nəcibə xanım özü... Yəni rejissor bu film üçün aktyor heyətini doğru seçib".

Qeyd edək ki, "Ögey ana" filminin rejissoru Həbib İsmayılovdur. Filmdə Nəcibə Məlikova (Dilarə), Ceyhun Mirzəyev (İsmayıl), Həqiqət Rzayeva (Qəmər) kimi sənətkarlarımız rol alıb.