Əziz və hörmətli mətbuat nümayəndələri! Sizi Azərbaycan milli mətbuatının 150 illik yubileyi münasibəti ilə ürəkdən təbrik edirəm!

1875-ci ildə Həsən bəy Zərdabinin nəşr etdirdiyi “Əkinçi” qəzeti ilə əsası qoyulan milli mətbuatımız xalqımızın özünüdərk, milli mənliyinin formalaşmasında, mənəvi dəyərlərin qorunub saxlanmasında misilsiz rol oynayıb. 150 il ərzində Azərbaycan mətbuatı çətin, lakin şərəfli yol keçərək bu gün özünün yüksək peşəkarlıq və müasir inkişaf səviyyəsinə çatıb.

Xalqımızın Ümummilli Lideri Heydər Əliyev hər zaman mətbuatın inkişafına xüsusi önəm verib, söz azadlığının təmin olunmasını ölkənin demokratikləşmə yolunda əsas amilllərdən biri kimi dəyərləndirib. Ulu Öndərin əsasını qoyduğu bu siyasət Prezident İlham Əliyev tərəfindən uğurla davam etdirilir. Dövlətimizin başçısının rəhbərliyi ilə ölkədə müstəqil medianın inkişafı, jurnalistlərin sosial rifahının yüksədilməsi və informasiya təhlükəsizliyinin təmin olunması istiqamətində mühüm addımlar atılır.

Nəticədə bu gün Azərbaycan mətbuatı beynəlxalq informasiya məkanında öz layiqli yerini tutmağa nail olub. Azərbaycanın media orqanları təkcə ölkə daxilində deyil, beynəlxalq auditoriyaya da doğru, dolğun və obyektiv məlumatlar çatdırmaqla böyük işlər görür, jurnalistlərimiz cəmiyyətin vicdan səsi, haqqın, ədalətin carçısı olaraq ictimai şüurun formalaşmasında mühüm rol oynayırlar. İstər 44 günlük Vətən müharibəsi dövründə, istərsə də sonrakı bərpa və quruculuq illərində Azərbaycan mediasının göstərdiyi fəaliyyət son dərəcə yüksəkdir.

Milli mətbuatımızın zəngin irsini qorumaq, yaşatmaq və gələcək nəsillərə ötürmək hər birimizin borcudur. Qürurverici haldır ki, bu gün media nümayəndələrimiz müasir texnologiyalarla işləyir, qlobal informasiya çağırışlarına çevik cavab verirlər. Milli mətbuatın sabit, azad və obyektiv fəaliyyət göstərməsi üçün yaradılan şərait, hüquqi baza və dövlət dəstəyi yeni uğurların təməlidir.

Milli mətbuatımızın 150 illik yubileyi münasibətilə bütün mətbuat işçilərini ürəkdən təbrik edirəm, yaradıcılıq uğurları və yeni zirvələr arzulayıram! Bayramınız mübarək!