Zaur Əmiraslanov gənc olmasına baxmayaraq, bir çox nailiyyətlərə imza atmış istedadlı müğənnilərdəndir. Zaur bəy bizimlə söhbət zamanı çoxlarının bilmədiyi gizli məqamlara aydınlıq gətirdi.

Axar.az əməkdar artist Zaur Əmiraslanovla müsahibəni təqdim edir:

Sadə Azərbaycan vətəndaşı...

- Zaur bəy, özünüz haqda qısa məlumat verərdiniz.

- Zaur Əmiraslanov – təvazökar, hədsiz dərəcədə xalqını sevən sadə Azərbaycan vətəndaşı.

- Bəs ətraflı təqdim etsəniz?

- Daha ətraflı desək, Azərbaycan Respublikasının əməkdar artisti, DİN daxili qoşunlarının hərbi orkestrinin dirijoru, baş leytenant rütbəli hərbçi, dünya üzrə klassik şedevr əsərlərin peşəkar ifaçısı və ən əsası Azərbaycanda zövqlü musiqinin təbliğatçısı Zaur Əmiraslanov.

- Yəqin ki, sadaladığınız nailiyyətlərə imza atana qədər başqa uğurlarınız olub.

- Bəli, 2008-ci ildə Moskvada Böyük Vətən Müharibəsinin ildönümünə həsr edilən müsabiqədə birinci yerə layiq görüldüm. Sonra doğma Bakımızda keçirilən "Sülh şəfəqləri" müsabiqəsində ikinci yer tutdum. 2001-ci ildə isə Bakıda keçirilən "Bakı payızı" yarışmasında birinci yeri əldə etdim. AzTV-nin keçirdiyi "Yaşıl yarpaq" müsabiqəsində ikinci yerə layiq görüldüm. Qeyd edim ki, həmin yarışmada bir çox tanınmış estrada ulduzları da ilk dəfə iştirak edirdilər. 2012-ci ildə 16 türkdilli dövlətlər arasında "Şarkı yarışması"nda birinci yer əldə etdim.

İfa zamanı qonaqlar hovuza atıldı...

- Zaur bəy, son zamanlar sizin iştirakınızla maraqlı bir çarx izlənmə rekordu qırıb. Siz toyda mahnı ifa edərkən qəfildən orada iştirak edən qonaqlar hovuza atılır və üzməyə başlayır. Düşünmürsünüz ki, bu sizin ifanıza qarşı hörmətsizlikdir?

- Əlbəttə, bu, qeyri-etik davranışdır. Amma italyan, alman, ingilis qonaqların etdiyi hərəkət birinci növbədə ev yiyəsinə olan hörmətsizlikdir. Nəzərə alsaq ki, onlar xaricdən təşrif buyurublar və öz "sərbəstlik cədvəllərinə" uyğun hərəkət edirlər, o zaman heç bu haqda danışmağa dəyməz. Toy sahibi olduqca nüfuzlu və hörmətli şəxs olduğundan mənə yaxınlaşdı və onun nə qədər həyəcan keçirdiyinin həmin an canlı şahidi oldum. Biz heç birimiz bu cür münasibətlə qarşılaşacağımızı gözləmirdik.

- Bu cür qeyri-etik hərəkətləri yalnız əcnəbilərdən görürsünüz, ya milli toy şənliklərində də sizin əsəblərinizi tarıma çəkənlər tapılır?

- İnandırım sizi, ürəyiniz istəyən qədər olur belə şeylər! Bir də görürsünüz ki, not haqqında anlayışı olmayan insan peşəkar musiqi ilə on il məşğul olan konservatoriya məzunu Zaur Əmiraslanova yaxınlaşır və elə bir iddia irəli sürür ki, burada gülməmək mümkün deyil.

Kölgəlikdə elə insanlar yaşayır...

- Necə düşünürsünüz, bu, nə ilə əlaqədardır?

- Mən öz-özlüyümdə düşünüb bu qərara gəlmişəm ki, məşhur deyimdə deyildiyi kimi, "böyük insanların böyük problemləri olur" prinsipinə uyğun olaraq, insan kəşf edildikcə və tanındıqca onun problemləri də böyüyür. Ümumiyyətlə, Bakı kimi meqapolisdə yaşamaq psixoloji cəhətdən çətindir. Bəzən baxırsan ki, Bakıdan kənarda maraqlı və həssas musiqi duyumuna malik insanlar yaşayır!

- Məni və musiqi sahəsindən anlayışı olan bir çox insanı düşündürən, narahat edən ziddiyyətli bir məqam var. Zaur Əmiraslanov kimi digər istedadlı və eyni zamanda nadir səsə malik müğənnilərimizi çox vaxt toy əhli qarşısında bada vermirik ki?

- Gözəl sualdır. Əslində, deyirlər ki, toy məktəbdir. Mən deyərdim ki, birinci məktəb konservatoriyadır. Opera və Balet Teatrının solisti, əməkdar artist, mərhum müəllimim Ağakərim Kərimovun mənim üzərimdə hədsiz zəhməti olub. Allah ona qəni-qəni rəhmət eləsin.

Toyda insanlarla ünsiyyəti öyrənmək mümkündür və heç kəs sənə oxumağı öyrədə bilməz. Nəzərə alsaq ki, müğənnilərin qazancı yalnız toylardan çıxır, o zaman bizi anlamaq elə də çətin olmaz.

Mədəniyyət nazirimiz...

- İstərdim bu barədə təfərrüatı ilə danışasınız. Yəni mən bir dinləyici kimi Zaur Əmiraslanovu dinləmək üçün yəqin ki, toya getməməliyəm, elədir?

- Əlbəttə. Dünya klassik musiqinin şedevr incilərini dinləmək üçün konsert təşkil olunmalıdır.

- Elə isə niyə olunmur?

- Müğənni konsert təşkil etmir. Bunu Mədəniyyət və Turizm Nazirliyinin idarə bölmələri həyata keçirir. Mən Mədəniyyət və Turizm naziri Əbülfəs Qarayevlə bu məsələ ilə bağlı görüşmüşəm. İnandırım sizi, olduqca kübar və musiqiyə, sənətə dəyər verən insandır. O, mənə xoş sözlərini bildirdi, dedi ki, Zaur, sənin yaradıcılığını, səs tembrini bəyənirəm. Daha sonra müvafiq aidiyyəti bölmələrə göndərdi ki, orada mənim konsertimin təşkilatçılığı ilə məşğul olsunlar.

- Siz müraciət etdinizmi?

- Əlbəttə. Lakin nazirin göstərişi ilə müraciət etdiyim xanım mənə bildirdi ki, Heydər Əliyev sarayında konsert keçirmək və ya təşkil etmək bizim işimiz deyil, ora təsərrüfat hesablıdır. Gedin, 15 min manat tapın və konsertinizi keçirin!

Bir diskim belə yoxdur...

- Əgər müğənni olmasaydınız, hansı sahəni seçərdiniz?

- Mənim xarici dillərə hədsiz dərəcədə meylim var. Anam ingilis dili müəlliməsi, atam mühəndisdir. Ailədə üç qardaşıq. Çox güman ki, mən ingilis dili üzrə tərcüməçi olardım.

- Ailənizdən kimsə yaradıcılıqla məşğuldurmu?

- Yox, bu sahə ilə bir tək mən məşğulam.

Çoxluqda Allah belə unudulur

- Yəqin ki, istiqamətləndirmə olmadan peşə seçmək çətindir.

- Deməzdim. Əksinə, inanın ki, o zaman uğurlara daha tez imza atırsan. Çünki tək olduğun üçün artıq sənin planlarını heç kəs bilmir və heç kəs sənin işinə mane olmur. Psixoloji olaraq təfəkkür də bu cür qaydaya uyğun inkişaf edir. Çoxluqda Allah belə unudulur. İnsan yalnız təkliyə çəkildikdə özü ilə Allah arasındakı təması duymuş olur.

- Zaur bəy, eşitdiyimizə görə, gözəl səsi qorumaq üçün hökmən içkidən, siqaretdən uzaq durmaq gərəkdir. Başqa hansı şərtlərə əməl etmək lazımdır ki, səs hər zaman qaydasında olsun və öz məlahətini itirməsin?

- Zamanında bu barədə çox danışmışam. Özüm haqqında əvvəlcə onu qeyd edim ki, içmirəm. Həcc ziyarətinə getdiyim andan içkini tərgitmişəm. Arada siqaret çəkməyim isə bir o qədər də səsimə zərə vurmur. O ki qaldı səsi qorumağa, müğənnilər vaxtında yatmalıdır və beyinləri də yorğun olmamalıdır ki, səsləri daim qaydasında olsun.

"Sevgi" sözünü sevmirəm...

- Allaha qovuşmaq haqqında fikirlərinizdən ibadət əhli olduğunuzu anladım. Sizcə, insanın Allahdan başqa himayədarı və köməyi ola bilərmi?

- Yalnız Allahın istəyi ilə ola bilər. Çünki o himayədarı belə Allah özü göndərir. Mənim şəxsən adını çəkmək istəmədiyim bir himayədarım var ki, ona hədsiz minnətdaram.

- Görəsən, sizin "Məktublar" və "Yağış" mahnınızı kölgədə qoya biləcək yeni ifanız olacaqmı?

- (Gülür) Olmayacaq. Çünki o mahnılar artıq öz möhürünü vurub. Yenisi ola bilər, maraqlı və fərqli.

- Zaur bəy özü yağışlı gündə qumlar üstündə məktub yazıbmı kiməsə?

- Cavanlıqda olub. İndi artıq ailəliyəm, iki yaşında balaca qızım var.

- "Sevgi" sözünə münasibətiniz necədir?

- Sevgi sözünü heç sevmirəm. AFFA transkripsiyasında iki FF kar samitlərində pozuntu olduğu kimi, orada da ahəng qanunu pozulub. Elə F-ləri silərdilər, qalaydı A-lar. "Vg" hərf birləşməsi orada olduqca kobud səslənir. Mən Allaha, həyata, insana və bütün bəşəriyyətə olan sevginin özünü bəyənirəm.