Bakıya ilk dəfə səfər etməkdən məmnunam və azərbaycanlı musiqiçilərlə birgə konsert verməyi səbirsizliklə gözləyirəm.

Kult.az xəbər verir ki, bu sözləri Azərbaycan ilə Fransa arasında diplomatik münasibətlərin qurulmasının 25 illiyi münasibətilə XII Bakı Beynəlxalq Caz Festivalında çıxış etmək üçün paytaxtımıza gələn fransalı dünya şöhrətli akkordeon və bandoneon ifaçısı, bəstəkar Rişar Qalyano jurnalistlər üçün keçirilən mətbuat konfransında deyib.

Tədbirdə əvvəlcə çıxış edən Fransanın Azərbaycanda səfiri xanım Orelia Buşez festivalın ölkələrimiz arasındakı mədəniyyət əlaqələrinin genişləndirilməsi üçün önəmli olduğunu vurğulayıb. Rişard Qalyanonun festivalda iştirakının onlar üçün bu tədbirin əhəmiyyətini daha da artırdığını deyən səfir qeyd edib ki, musiqiçini nəinki Fransada, həm də bütün dünyada "canlı əfsanə" adlandırırlar.

Rişar Qalyano Bakıda insanların istiqanlı olmasının onda xoş təəssürat oyatdığını qeyd edib. Müxtəlif ölkələrin milli musiqilərinə qulaq asdığını diqqətə çatdıran fransalı ifaçı Azərbaycan muğamını dinləmək istədiyini bildirib. O, Bakıdakı konsertinin caz pərəstişkarlarının yaddaşında hələ uzun müddət qalacağına inamını ifadə edib.

Qeyd edək ki, əllidən çox diski işıq üzü görən Rişard Qalyano dünya şöhrətli Çet Beyker, Edi Luis, Ron Karter, Vinton Marsalis, Çarli Aden, Qeri Berton və digər caz musiqisi ifaçıları ilə əməkdaşlıq edib. O, iki dəfə "Victoire de la Musique Jazz" (1997, 1998), "İncəsənət və ədəbiyyat üzrə Zabit Ordeni", “Victoire de la Musique Classique” (2014), həmçinin SACEM mükafatlarına layiq görülüb. Musiqiçinin dahi alman bəstəkarı İohann Sebastyan Baxın musiqilərinə həsr olunmuş albomu nüfuzlu “Deutsche Grammophon” studiyasında işıq üzü görüb.