Noyabrın 7-də Azərbaycan Dövlət Akademik Opera və Balet Teatrında Cüzeppe Verdinin "Traviata" operasının tamaşası keçiriləcək.

Axar.az xəbər verir ki, tamaşada aparıcı partiyalardan biri - Violetta partiyasını teatrımızın istedadlı solisti, əməkdar artist, Prezident mükafatçısı İnarə Babayeva, Alfred rolunu isə əməkdar artist Fərid Əliyev ifa edəcəklər.

Onlarla yanaşı, opera səhnəmizin parlaq simalarından biri - xalq artisti, Vokalçıların Bülbül adına I müsabiqəsinin Qran-Pri mükafatçısı Əli Əsgərov (Markiz d`Obinyi), əməkdar artistlər Səbinə Vahabzadə (Flora) və Anton Ferştandt (Doktor Qrevil) çıxış edəcəklər.

Klassik opera və balet tamaşalarına xaricdən tanınmış vokal və balet sənəti ulduzlarının dəvət edilməsi ilə bağlı teatrda çoxdan formalaşmış ənənəyə sadiq qalaraq bu dəfə də teatrın rəhbərliyi "Traviata" operasının tamaşasında çıxış etmək üçün Almaniya və Ukraynalı sənətçiləri qastrola dəvət edib. Azərbaycanlı opera sənətçiləri ilə birlikdə Ukrayna Milli Operasının aparıcı solisti, Ukraynanın əməkdar artisti, Vokalçıların beynəlxalq müsabiqələrinin laureatı Dmitri Qrişin tamaşada Jermon rolunu ifa edəcək. Opera tamaşasını Almaniyalı dirijor, Qut-İmmlinq opera sənəti festivalının musiqi rəhbəri və baş dirijoru Korneliya fon Kerssenbrok idarə edəcək.