Dekabrın 1-də bəstəkar Aygün Səmədzadənin yaradıcılıq gecəsi keçirilib.

Axar.az xəbər verir ki, əməkdar incəsənət xadimi Aygün Səmədzadənin yaradıcılıq gecəsi Heydər Əliyev Sarayında baş tutub.

Aygün Səmədzadə tədbiri tamaşaçılara təşəkkür edərək açıb:

"Nə yaxşı ki, məni görürsünüz. Nə yaxşı ki, burdasınız. Sizin sevginiz olmasaydı, səhnədə olmazdıq. İnanıram ki, bu gün hər bir tamaşaçı gecədən yüksək əhval-ruhiyyə ilə ayrılacaq".

Gecədə xalq artistləri Nisə Qasımova, Brilyant Dadaşova, əməkdar artistlər İlqar Muradov, Elton Hüseynəliyev, Lalə Məmmədova, Eyyub Yaqubov, Aygün Bəylər bəstəkarın mahnısını səsləndirib.

Aygün Səmədzadə bir neçə mahnını duet, "Ömür gedir" mahnısını isə solo ifa edib.

Tədbirdə Mədəniyyət və Turizm naziri Əbülfəs Qarayev, nazir müavini Ədalət Vəliyev ilə yanaşı, "Gündəlik Teleqraf" MMC-nin rəhbəri Aynur Camalqızı, millət vəkilləri və sənət adamları iştirak ediblər. Gecənin aparıcısı Murad Arif olub.