Mədəniyyət və Turizm Nazirliyi və Müdafiə Nazirliyinin təşkilatçılığı ilə bir qrup müğənni, xanəndə ilə birlikdə cəbhə bölgəsinə getdim.

Bu sözləri əməkdar artist Hüsniyyə Mürvətova cəbhə bölgəsinə getməsi haqda Axar.az-a danışarkən deyib. O, çox gözəl, maraqlı konsert keçdiyini bildirib:

"Vətənpərvər ruhda bir konsert keçdi, bizimlə birlikdə rəhbərimiz kimi Loğman Kərimov da getmişdi, o, həm də konsertin rejissoru idi. Xanəndələrdən əməkdar artistlər Zakir Əliyev, Almaz Orucova, müğənnilərdən Nadir Qafarzadə, İlhamə Qasımova, əməkdar artist Xəyyam Mustafazadə, "Qaya" qrupu bizimlə birlikdə oldu. Konsert çox pozitiv, yaxşı keçdi. Çox istəyirdim, əsgərlərimizi görüm. Mədəniyyət və Turizm Nazirliyinə minnətdaram ki, mənim bu arzumu həyata keçirdi. Orada da qeyd etdim, əlimdə olsa, cəbhədən getmərəm. Həmişə əlimdən gələn dəstəyi göstərməyə hazıram. Çalışdıq ki, əsgərlərimizə onlarla daim bir yerdə olduğumuzu göstərə bilək".