ABŞ Prezidenti Donald Tramp Ağ Evə qayıtdıqdan sonra ilk dəfə olaraq avqustun 15-də Alyaskada Kreml lideri Vladimir Putinlə şəxsən görüşməyi və Ukraynada atəşkəsi müzakirə etməyi planlaşdırır.

Axar.az xəbər verir ki, bu barədə “Nyu York Tayms” nəşri yazıb.

Nəşr qeyd edir ki, bir çox analitiklər və Tramp administrasiyasının keçmiş rəsmiləri Putinin bu görüşdən Trampı yenidən öz xeyrinə istifadə etmək üçün yararlanacağından ehtiyatlanırlar.

Bildirilib ki, prezidentliyinin ilk müddətində Tramp Putinlə altı dəfə görüşüb, eləcə də onunla bir neçə telefon danışığı aparıb. Müqayisə üçün: Trampın varisi Co Bayden 2021-ci ildə — Rusiyanın Ukraynaya qarşı tammiqyaslı işğalından əvvəl Putinlə yalnız bir dəfə görüşmüşdü.

“Tramp və Zelenski arasında Oval kabinetdə baş verən qalmaqaldan sonra avropalılar, ukraynalılar və administrasiyada Ukrayna tərəfdarları Ukraynanın mübarizəsini davam etdirməsinə kömək etmək və Trampın münaqişədə Rusiya mövqeyini qəbul etməsinin qarşısını almaq məqsədilə siyasət formalaşdırdılar", - deyə Karnegi Beynəlxalq Sülh Fondunda tədqiqatlar üzrə vitse-prezident Endryu Vays bildirib.