İtaliyanın Lampedusa adası yaxınlığında miqrantları daşıyan qayığın batması nəticəsində ən azı 26 nəfər ölüb, 60 nəfər xilas edilib.

Axar.az xəbər verir ki, bu barədə “Röyters” məlumat yayıb.

Sahil mühafizəsinin bildirdiyinə görə, axtarış-xilasetmə əməliyyatı davam edir və ölənlərin sayı dəqiqləşdirilir.

Xilas edilən miqrantların sözlərinə görə, onlar səhər tezdən Liviyanın Tripoli bölgəsindən iki qayıqla yola çıxıblar. Qayıqlardan biri su almağa başlayıb və onlar digər qayığa keçiblər. Lakin bir müddət sonra həmin qayıq da pis hava şəraitində çevrilib.

Sahil mühafizəsi bildirir ki, hadisə yerində beş gəmi, iki təyyarə və bir helikopter işləyir. BMT-nin Qaçqınlar üzrə Ali Komissarlığının (UNHCR) ilkin məlumatına görə, miqrantların sayı 92-97 nəfər arasında olub.