Demokratik cəmiyyətdə hakimiyyət dəyişikliyi yalnız seçkilər vasitəsilə, əhalinin əksəriyyətinin rəyinə əsasən mümkündür.

Axar.az xəbər verir ki, bu sözləri Gürcüstanın hakim "Gürcü Arzusu – Demokratik Gürcüstan" partiyasının baş katibi, Tiflis meri Kaxa Kaladze deyib.

Kaladzenin sözlərinə görə, Gürcüstan hakimiyyəti ölkədə sülh və sabitliyi qorumaq üçün əlindən gələni edəcək və xaricdən idarə olunan qüvvələrin dövlət çevrilişi həyata keçirməsinə imkan verməyəcək:

“Gürcüstanda inqilab cəhdləri əvvəllər də olub və indi oxşar planlar xarici qüvvələrlə əlaqəli radikalların dəstəyi ilə yenidən mövcuddur.

Düşünürəm ki, bu cür cəhdlər davam edəcək, lakin Gürcüstan hakimiyyəti və dövləti çevrilişə imkan verməyəcək. Onlar kənardan idarə ilə kiminsə qan tökməsinə, xalq arasında qarşıdurmaya səbəb olmasına imkan verməyəcəklər. Bu baş verməyəcək. Bütün dövlət qurumlarının ən yaxşı vəziyyətdə olması üçün hər şey ediləcək”.

Bundan əlavə, iddia edilir ki, ABŞ-ın Beynəlxalq Respublika İnstitutunun Gürcüstan proqramlarının direktoru Con Dipiro hakimiyyətin Avropa Komissiyasının tələblərini yerinə yetirməyəcəyi halda etiraz aksiyalarının inkişaf planını hazırlayacaq. Plana əsasən, 13 sentyabrda etiraz aksiyası keçiriləcək, daha sonra isə müxalifət liderləri və vətəndaş cəmiyyətinin fəallarının ABŞ-a səfəri təşkil olunacaq.