Son 10 gün ərzində Ukrayna Rusiyanın tammiqyaslı işğalı başlayandan bəri diplomatik fəaliyyətin ən intensiv “partlayışlarından” birini gördü. ABŞ Prezidenti Donald Tramp Rusiya Prezidenti Putinlə, ardınca Ukrayna Prezidenti Vladimir Zelenski və Avropa liderləri ilə görüşüb.

Axar.az xəbər verir ki, “Nyu York Tayms” həm döyüş meydanında, həm də diplomatik cəbhədə Ukraynanı bundan sonra nələrin gözlədiyini proqnozlaşdırıb.

Nəşr qeyd edib ki, müharibə sammitləri sülh sazişi və ya atəşkəs olmadan başa çatıb. Optimist bəyanatlar da müharibənin həllinə o qədər də təkan vermədi - əsas mübahisəli məsələlər həll olunmadı.

"Putin və Zelenski arasında zirvə görüşünün baş tutması indi mümkün deyil, baxmayaraq ki, Ukrayna prezidenti dəfələrlə buna hazır olduğunu bəyan edib və bunu müharibəyə son qoymağın yeganə yolu adlandırıb. Alyaska sammitindən sonra Ağ Ev bildirib ki, Putin Trampın belə bir görüşü təşkil etmək təklifi ilə razılaşıb. Lakin Ağ Ev bundan sonra daha pessimist fikir bildirib", - jurnalistlər əlavə edirlər.

Öz növbəsində, Rusiyanın xarici işlər naziri Sergey Lavrov belə bir görüşün planlaşdırılmadığını və hər halda, ilk növbədə gündəliyin razılaşdırılmalı olduğunu bildirib.