İrəvan ABŞ-ın keçmiş prezidenti Co Bayden administrasiyasının işindən narazı qalıb.

Axar.az xəbər verir ki, bunu Ermənistanın Baş naziri Nikol Paşinyan ABŞ-ın keçmiş dövlət katibinin köməkçisi Ceyms Obrayenin bəyanatlarını şərh edərkən deyib.

“Əgər cənab Obrayen Ermənistanın zəifliyindən danışırsa, qeyd etməliyəm ki, onun və onların hakimiyyəti dövründə Ermənistan Respublikası ən həssas vaxtlarını yaşayırdı. 2021, 2022 və 2023-cü il hadisələrini xatırlatmaq istərdim. Biz heç vaxt ABŞ-ın keçmiş administrasiyasının regionumuzda sülh gündəmini dəstəkləmək üçün verdiyi cavabdan və işindən razı qalmamışıq”, - o bildirib.

Qeyd edək ki, ABŞ dövlət katibinin keçmiş köməkçisi Ceyms Obrayen Ermənistan, ABŞ və Azərbaycan liderləri arasında Vaşinqtonda imzalanmış bəyannamənin İrəvana heç bir əhəmiyyətli sülh dividendləri verməyəcəyini və bunun münaqişənin sona çatmasına kömək etməyəcəyini demişdi.