Hazırda Rusiyanın qoşunlarını Moldovaya göndərmək üçün heç bir imkanı yoxdur.

Axar.az xəbər verir ki, bunu Rusiya-Ukrayna müharibəsinin veteranı, "Aydar" batalyonunun sabiq tağım komandiri Yevgeni Dikiy bildirib.

Onun sözlərinə görə, birincisi, buna Moldova özü imkan verməz. İkincisi isə rusların Moldovaya nəyinsə bahasına çatması lazımdır:

“Ya Rumıniya hava məkanından, ya da Ukrayna hava məkanından uçmaq lazımdır. Ona görə də hazırda bu, tamamilə istisnadır”.

Ekspert qeyd edib ki, Dnestryanı bölgədə yerləşən rus qüvvələri ciddi təhlükə yaratmır:

“Onlar bizə hücum etmək üçün kifayət deyil. Belə desək, həmin qüvvələr daim gözləyirlər ki, biz bir gün ora daxil olub onları təmizləyək. Onlar çox yaxşı bilirlər ki, orada hətta sadəcə müqavimət göstərmək üçün belə heç bir şansları yoxdur”.

Dikiy əlavə edib ki, Ukrayna Moldovanın suverenliyinə hörmət edir və qonşu ölkənin hakimiyyəti bu barədə müvafiq müraciət etməyib:

“Halbuki texniki cəhətdən biz bunu çox asanlıqla edə bilərdik”.