Sentyabrın 30-da səhər saatlarında Rusiya Federasiyası Daxili İşlər Nazirliyinin İqtisadi Təhlükəsizlik Baş İdarəsinin əməkdaşları Fövqəladə Hallar Nazirliyinin Kabardin-Balkar Respublikası üzrə Baş İdarəsinin rəisi, general-mayor Mixail Nadejini saxlayıblar.

Axar.az xəbər verir ki, bu barədə TASS hüquq-mühafizə orqanlarındakı mənbəyə istinadla məlumat yayıb.

General 2 milyon rublu mənimsəməkdə (Rusiya Cinayət Məcəlləsinin 290-cı maddəsinin 6-cı hissəsi – xüsusilə külli miqdarda rüşvət alma) şübhəli bilinir.

İstintaqın məlumatına görə, general iş adamı Anzor Noqmovdan rüşvət alıb, bundan sonra heç bir yoxlama aparmadan yanğın təhlükəsizliyi ilə bağlı sənədləri təsdiqləyib. Mənbənin bildirdiyinə görə, şübhəli şəxs sənaye və yanacaq-energetika müəssisələrində qəza-xilasetmə əməliyyatlarının aparılması üçün müqavilələr imzalayıb. Reallıqda isə Fövqəladə Hallar Nazirliyi tərəfindən binaya heç bir yoxlama aparılmayıb.

Nadejin 2015-ci ildən Kabardin-Balkar Fövqəladə Hallar Nazirliyinin rəhbəridir. 2019-cu ildə ona daxili xidmət general-mayoru rütbəsi verilib.

Qeyd edək ki, bir gün əvvəl Rusiya Milli Qvardiyasının Şimali Osetiya departamentinin rəisi, 58 yaşlı general-mayor Valeri Qolota rüşvətxorluq maddəsi ilə (Rusiya Cinayət Məcəlləsinin 290-cı maddəsinin 6-cı hissəsi) həbs edilib. İdarənin daha bir neçə məmuru da saxlanılıb.