Türkiyənin BMT Təhlükəsizlik Şurasının ləğv edilmiş qətnamələrinə əməl etməsi ilə bağlı son bildirişini gərəksiz və hüquqi cəhətdən etibarsız hesab edirik.

Axar.az xəbər verir ki, bunu İran Xarici İşlər Nazirliyinin sözçüsü İsmayıl Bəqai deyib.

O bildirib ki, Tehran Türkiyənin BMT TŞ-nin ləğv edilmiş qətnamələrini yerinə yetirmək üçün son addımlarını hüquqi cəhətdən əsassız hesab edir. Bəqai vurğulayıb ki, üç Avropa ölkəsi - Fransa, Almaniya və Böyük Britaniyanın sanksiyaları bərpa etməsinin hüquqi əsası yoxdur.

O, bütün ölkələri, xüsusən də İranın qonşuları və dost dövlətlərini üç Avropa ölkəsinin qanunsuz hərəkətlərini qanuniləşdirə biləcək istənilən tədbirdən çəkinməyə çağırıb.

Qeyd edək ki, Türkiyə İrana sanksiya tətbiq edib. Qərara əsasən, İranın “uranın zənginləşdirilməsi prosesi”ndə iştirak edən şəxslərin Türkiyədəki sərvət və əmlakları dondurulub.