ABŞ yeni sanksiyaların tətbiqinə baxmayaraq hələ də Rusiya ilə danışıqlar aparmaq istəyir.

Axar.az xəbər verir ki, bunu ABŞ Dövlət katibi Marko Rubio deyib.

“Biz hələ də ruslarla görüşmək istərdik. Xarici işlər naziri Lavrovla yaxşı telefon danışığım oldu və biz müzakirəni davam etdirəcəyik. Sülhə nail olmaq imkanı olarsa, həmişə qarşılıqlı fəaliyyətdə maraqlı olacağıq”, - o bildirib.

Rubio əlavə edib ki, ABŞ Prezidenti Donald Tramp dəfələrlə bəyan edib ki, sülh sazişində irəliləyiş əldə olunmasa, tədbir görməli olacaq.

Qeyd edək ki, oktyabrın 22-dən 23-nə keçən gecə ABŞ Maliyyə Nazirliyi Rusiyanın Ukrayna münaqişəsinin sülh yolu ilə həllində kifayət qədər marağı olmadığına görə iki aparıcı neft şirkəti olan “Rosneft” və “Lukoyl”a yeni sanksiyalar tətbiq edib.