09:09

Ukraynanın paytaxtı Kiyevdə partlayışlar baş verib.

Axar.az xəbər verir ki, bu barədə Kiyev şəhərinin meri Vitali Kliçko Teleqram kanalında paylaşım edib.

Kliçkonun sözlərinə görə, şəhərin Desnyan və Darnitsa rayonlarında qeyri-yaşayış binalarında güclü yanğınlar baş verib. Dnepr rayonunda isə yaşayış binaları zədələnib, pəncərələr qırılıb, avtomobillər yararsız hala düşüb, binalardan birinin həyətində krater əmələ gəlib.

Kiyev Şəhər Hərbi Administrasiyasının rəhbəri Timur Tkaçenko isə həmin rayonda yerləşən uşaq bağçasının da hücumdan zərər çəkdiyini vurğulayıb.

Bildirilib ki, hücum nəticəsində 8 nəfər yaralanıb, onlardan 3-ü xəstəxanaya yerləşdirilib.

Paytaxta zərbələr endirildikdən sonra Ukrayna Hərbi Hava Qüvvələri ölkənin bütün ərazisində ballistik hücum təhlükəsi barədə xəbərdarlıq edib.

***

Rusiya ordusunun Kiyevə ballistik raketlərlə hücumu nəticəsində 1 nəfər ölüb.

Bu barədə Kiyev Şəhər Dövlət Administrasiyası məlumat yayıb.

Məlumatına görə, yaralananların sayı 10-a çatıb.