Rusiya və Çinin dəstəyi indiki şəraitdə İran üçün həyati əhəmiyyət kəsb edir. Həmçinin Pekin və ya Moskva ilə əlaqələrin hər hansı zəifləməsi Tehranın maraqlarına ziddir.

Axar.az xəbər verir ki, bu barədə iranlı politoloq Ruhulla Müdabber TASS-a açıqlamasında deyib.

Politoloqun sözlərinə görə, yaxın aylarda Böyük Britaniya, Almaniya, Fransa, ABŞ və İsraildən ibarət antiiran blokunun BMT Təhlükəsizlik Şurasında, xüsusilə dəniz məhdudiyyətləri sahəsində İran əleyhinə qərar qəbul etdirməyə çalışacağı gözlənilir:

“Belə vəziyyətdə İranın maraqlarını qorumaq üçün Rusiya və Çinin dəstəyi vacibdir, Moskva və Pekinlə münasibətlərin zəifləməsi isə ölkəyə zərər verə bilər. Hazırda Qərb təbliğat yolu ilə, eləcə də İran daxilində antirusiya gündəmini təbliğ etməklə Rusiya-İran dostluq münasibətlərini pozmaq üçün razılaşdırılmış addımlar atır. İranın müvafiq orqanları Qərbin hərəkətlərinə diqqət yetirməli və onları zərərsizləşdirmək üçün tədbirlər görməlidir”.