Dünyanın heç bir ölkəsində dövlət mediasının əməkdaşları qonşu ölkənin suverenliyini inkar edən fikirləri açıq şəkildə ifadə etmirlər. Amma Rusiya istisnadır.

Axar.az xəbər verir ki, bunu özbək jurnalist və bloger Nikita Makarenko rusiyalı təbliğatçı Vladimir Solovyovun Orta Asiya və Ermənistana xüsusi hərbi əməliyyat keçirmək çağırışına reaksiya verərkən deyib.

“Solovyov şəxsi mövqeyini ifadə etmir, o, ancaq ona tapşırılan mesajları yayımlayır. “Ortaq keçmiş”, “xalqlar dostluğu”, “şanlı SSRİ” və “ortaq qələbə” haqqında danışmaq, sadəcə, neokolonial siyasətin arxasında gizlənən bir pərdədir. Moskva Orta Asiya ölkələrinə bərabərhüquqlu tərəfdaş və ya müttəfiq kimi deyil, xammal və müstəmləkə bazası kimi baxır”, - o bildirib.

Jurnalist həmçinin Rusiya dövlətinin təsiri ilə yaradılan təşkilatların və strukturların, o cümlədən Rus Evi, təbliğat mediası və onları dəstəkləyən “beşinci kolon”un fəaliyyətinin diqqətlə araşdırılmasına çağırıb:

“Bu strukturlar Özbəkistandakı rusdilli azlığın maraqlarını təmsil etmir, əksinə imperialist siyasətin maraqlarına xidmət edir. Özbəkistanın rusdilli vətəndaşları dinc, suveren dövlət ideyası ətrafında birləşməli, “müstəmləkə ağaları” olmadan müstəqil həyat qurmalı və öz evlərini müdafiə etməlidirlər”.