ABŞ Prezidenti Donald Tramp Rusiyanın 1 fevrala qədər Kiyevin enerji sisteminə toxunmamaq barədə verdiyi vədin Ukraynaya güzəşt olduğunu eyhamla bildirib. Ukrayna isə Əbu-Dabidə keçiriləcək növbəti danışıqlar raundundan əvvəl “enerji üzrə atəşkəs”də israr edirdi.

Axar.az xəbər verir ki, bu barədə “Ekonomist” nəşri yazıb.

Nəşr bildirir ki, Rusiya lideri Vladimir Putin ola bilsin ki, vaxt qazanmağa çalışır. Lakin o, eyni zamanda kompromisə açıq olduğuna da işarə edə bilər – bu kompromisin konturları artıq yavaş-yavaş aydınlaşmağa başlayır:

“Ukrayna danışıqlar komandasına yaxın mənbələrin məlumatına görə, yanvarın 23 və 24-də Əbu-Dabidə ABŞ və Rusiya ilə aparılan üçtərəfli danışıqlar indiyə qədər ən konstruktiv danışıqlardan biri olub. Həll olunmamış əsas suallar bir neçə aydır dəyişməz qalır:

- Rusiya Ukrayna ilə ABŞ arasında razılaşdırılan təhlükəsizlik zəmanətlərini qəbul edə bilərmi?

- Ukrayna hələ də nəzarətində saxladığı ərazilərdən geri çəkilməli olacaqmı?”

Bununla belə, nəşr qeyd edir ki, razılaşmanın bəzi texniki aspektləri sanki artıq tənzimlənib:

“Böyük bir irəliləyişin ən azı mart ayına qədər gözlənilməsi çətindir. Çünki bu vaxta qədər Rusiyanın qış hücumu başa çatacaq və ölkənin artan iqtisadi problemləri daha da kəskinləşməyə başlayacaq”.