Avropa Birliyinin (AB) səfirləri Ukrayna üçün 90 milyard avro məbləğində kreditin detallarını təsdiqləyiblər. AB liderləri tərəfindən dekabr ayında razılaşdırılmış təşəbbüsün məqsədi 2026–2027-ci illərdə Kiyevin maliyyə ehtiyaclarının böyük hissəsini ödəmək və müharibə aparılmasını təmin etməkdir.

Axar.az xəbər verir ki, səfirlər razılaşmanı Brüsseldə keçirilmiş qapalı iclasda əldə ediblər.

Sazişin mətni hələlik açıqlanmayıb, lakin Avropa Birliyi Şurasının bəyanatında bildirilib ki, vəsaitlərin üçdə ikisi hərbi yardıma, üçdə biri isə ümumi büdcənin dəstəklənməsinə yönəldiləcək:

“Prinsip etibarilə müdafiə məhsulları yalnız AB-də, Ukraynada və ya Avropa İqtisadi Məkanı – EFTA ölkələrində yerləşən şirkətlərdən alınmalıdır. Əgər Ukraynanın hərbi ehtiyacları AB-də, Ukraynada və ya Avropa İqtisadi Məkanı – EFTA ölkələrində mövcud olmayan müdafiə məhsullarının təcili tədarükünü tələb edərsə, müəyyən istisnalar tətbiq olunacaq”.