Amerikalı jurnalist Lindsi Snell Türkiyədə həbs olunub.

Axar.az xəbər verir ki, jurnalistin həbsi ABŞ Dövlət Departamenti tərəfindən də təsdiqlənib.

"ABŞ vətəndaşı Lindsi Snell Türkiyədə 2016-cı ilin avqustun 7-də həbs olunub. O, hazırda Hatay vilayətindəki həbsxanada saxlanılır", - Dövlət Departamentinin rəsmisi Con Kirbi deyib.

Onun sözlərinə görə, ABŞ-ın Adanadakı konsulluğunun əməkdaşları sonuncu dəfə jurnalistə avqustun 26-da baş çəkiblər və ona lazımi yardım göstəriblər.

Kirbi bildirib ki, jurnalist həbs olunana qədər Suriyada imiş, sonradan Türkiyə ərazisinə keçib. Onun Suriyada hansı fəaliyyətlə məşğul olduğunu isə deməyib.

"NBC Nyus" telekanalının məlumatına görə, amerikalı diplomatlar jurnalistin Suriyadan keçməsi üçün Türkiyə-Suriya sərhədində olublar, amma Snell Türkiyə ərazisinə daxil olan kimi həbs olunub. Onun sərhədi qanunsuz keçməkdə ittiham olunduğu bildirilir.