Rusiya hücum əməliyyatlarını heç vaxt dayandırmayıb və faktiki olaraq, 2025-ci ildən 2026-cı ilə fasiləsiz keçib.

Axar.az xəbər verir ki, bunu Ukrayna Silahlı Qüvvələrinin baş komandanı Aleksandr Sırski deyib.

“Yeni il ərəfəsində hava şəraiti pisləşsə də, düşmənin hücum fəallığı çox yüksək olub. 2025-ci ildə Rusiya komandanlığının planları pozulub. Həmin vaxt Rusiya qüvvələri bütün Donetsk, Luqansk, eləcə də Dnepropetrovsk və Zaporojye vilayətinin böyük hissəsini ələ keçirməyə çalışırdı.

Kupyanskın ələ keçirilməsi ilə bağlı nə qədər elan olduğunu xatırlayırsınız. Pokrovsk neçə dəfə “ələ keçirildi”? 6-7 dəfə? Xatırlamıram. Və bu, 2024-cü ilin sentyabrından bəri davam edir. Sonra ilk dəfə Pokrovskun 30 sentyabrda “ələ keçiriləcəyini” elan etdilər.

Bu gün müdafiəçilərimiz Pokrovsk istiqamətində mövqelərini qoruyur, Pokrovsk və Mirnoqradın şimal ətraflarını nəzarətdə saxlayırlar. Düşmən hər gün mövqelərimizə hücum edir, itki verir və geri çəkilir", - deyə o bildirib.