ABŞ və İsrailin İrana qarşı müharibəsinin nəticələri bütün dünyada hiss olunur. Hindistan və Banqladeşdə fabriklər bağlanır, İrlandiya, Polşa və Almaniyada hava daşımalarında fasilələr yaranır, Vyetnam, Cənubi Koreya və Tailandda isə elektrik enerjisinin istifadəsinə məhdudiyyətlər tətbiq edilib.

Axar.az xəbər verir ki, bu barədə “Nyu York Tayms” nəşrində qeyd olunub.

“Hətta dünyanın ən zəngin ölkələrindən biri olan BƏƏ belə qaz yataqlarına ziyan dəydikdən və Hörmüz boğazı bloklandıqdan sonra ABŞ-dan maliyyə yardımı istəməli olub. Cəmi 8 həftə ərzində bu münaqişə qlobal iqtisadi perspektivlərə ciddi zərbə vurub.

Ən böyük iqtisadi çətinlikləri yoxsul ölkələr hiss edəcək. Çünki bu ölkələrdə istehlakçılar enerji qiymətlərinin artımını qarşılaya bilmir, hökumətlər isə xərcləri kompensasiya etmək üçün kifayət qədər imkanlara malik deyil. Maliyyə şərtləri sərtləşdikcə bu ölkələr üçün zəruri kreditlərin dəyəri də artır.

Yanacaq və gübrə qiymətlərinin sürətlə artması səbəbindən ilin sonunda ərzaq qiymətlərinin də yüksələcəyi gözlənilir. Asiya ölkələri artıq yanacaq çatışmazlığı ilə mübarizə aparır və müharibə uzandıqca bu problem daha da dərinləşəcək. Nəticədə sənaye müəssisələri fəaliyyətini dayandırmağa məcbur qalacaq.

Hindistanda metallurgiya zavodları və Yaponiyada avtomobil istehsalçıları enerji qiymətlərinin artması və tələbin azalması ilə bağlı narahatlıqlar səbəbindən istehsalı azaldıblar. Çində isə oyuncaq istehsalı ilə məşğul olan fabriklərin işçiləri işlərini itirirlər.

Hörmüz boğazının bağlanması nəticəsində helium, alüminium və neft kimi məhsulların çatışmazlığı yaranıb. Bu isə prezervativlərdən tutmuş mikroçiplərə qədər geniş çeşiddə məhsulların tədarükünə təsir edir”, - nəşr bildirib.