İsrailin xarici kəşfiyyat xidməti olan MOSSAD-ın rəhbəri vəzifəsindən ayrılan David Barnea İranda mövcud siyasi sistemin dəyişdirilməsi ilə bağlı diqqətçəkən açıqlama verib.

Axar.az Musavat.com-a istinadən xəbər verir ki, Barnea təqaüdə yola salınması münasibətilə keçirilən mərasimdə çıxış edərək, İsrail İranla bağlı strateji məqsədlərindən geri çəkilməməli olduğunu bildirib.

Onun sözlərinə görə, son hərbi qarşıdurmalardan sonra İran hakimiyyəti tarixinin ən çətin və zəif dövrlərindən birini yaşayır və bu vəziyyət İsrail üçün yeni imkanlar yaradır.

MOSSAD-ın keçmiş rəhbəri vurğulayıb ki, o, uzun illərdir İranda siyasi sistemin dəyişməsinin mümkün olduğuna inanır və bu fikrində qalır:

“Mən inanırdım və hələ də inanıram ki, İranda reallığın rejimin devrilməsi yolu ilə dəyişdirilməsi mümkün və nail oluna biləcək məqsəddir”.

O vurğulayıb ki, bu məqsədə çatmaq üçün davamlı fəaliyyət, strateji səbr, soyuqqanlı yanaşma və missiyaya tam sadiqlik tələb olunur.

Barneanın istefa mərasimi zamanı İsrailin Baş naziri Benjamin Netanyahu da İranla bağlı sərt mesajlar verib. Netanyahu bildirib ki, İran artıq çox ağır zərbələr alıb və ölkədəki mövcud rejimin təməlləri sarsılıb.

Baş nazirin sözlərinə görə, Tehran əvvəlki gücündə deyil və gələcəkdə daha ciddi daxili problemlərlə üzləşə bilər.

Xatırladaq ki, David Barnea 2021-ci ildən MOSSAD-a rəhbərlik edib. İsrail hökuməti artıq onun yerinə yeni rəhbərin təyin olunmasını təsdiqləyib və yaxın günlərdə vəzifəni Roman Qofman təhvil alacaq.