ABŞ uzun müddətdir ki, Ukraynanı “siyasi problem” və ya hətta “iqtisadi yük” kimi qəbul edib. ABŞ Prezidenti Donald Trump administrasiyası genişmiqyaslı müharibəni tez bir zamanda başa çatdıracaq razılaşma əldə edə biləcəyi ehtimalından Rusiyanın güzəştsiz mövqeyi səbəbindən nəticə verməyən uzunmüddətli danışıqlar mərhələsinə keçib.

Axar.az xəbər verir ki, bunu Rusiyanın keçmiş xarici işlər naziri Andrey Kozırev bildirib.

O, “Nyusvik” üçün yazdığı məqalədə qeyd edib ki, Ukrayna artıq sadəcə Qərbin yardım alan tərəfdarı deyil, həm də Qərbin öz təhlükəsizliyinin təmin edilməsində iştirak edən bir ölkəyə çevrilib.

Keçmiş nazir xatırladıb ki, SSRİ dağıldıqdan sonra Rusiya və Ukraynanın demokratik inkişaf yolları ayrılıb. Rusiya yenidən avtoritarizmə doğru sürüşməyə başlayıb və nəticədə şəxsi hakimiyyətə əsaslanan tiraniyaya çevrilib.

Kozırev vurğulayıb ki, Ukrayna təkcə təcavüzə müqavimət göstərmək deyil, həm də getdikcə daha effektiv əks-zərbələr endirmək qabiliyyətini nümayiş etdirib.

O qeyd edib ki, Ukrayna dronlardan istifadə, döyüş meydanına uyğunlaşma və elektron müdafiə sahələrində yeni yanaşmalar formalaşdıraraq dünyanın ən innovativ hərbi laboratoriyalarından birinə çevrilib.

Kozırevə görə, işğalı dəf etmək üçün lazım olan müasir silahları əldə etməyə kömək etmək Kremli müharibəni dayandırmağa və qoşunlarını işğal olunmuş ərazilərdən çıxarmağa məcbur etməyin yeganə real yoludur.