Türkiyədə keçirilən sammit zamanı NATO ölkələri 2026–2027-ci illər ərzində Ukraynaya ümumi məbləği ən azı 140 milyard avro olan hərbi yardım göstərmək öhdəliyi götürüblər. Lakin bu planın həyata keçiriləcəyinə dair ciddi şübhələr var.

Axar.az xəbər verir ki, bu barədə “Neue Zürcher Zeitung” nəşrindəki məqalədə bildirilib.

Məqalənin müəllifləri qeyd edirlər ki, sammitin yekun bəyannaməsində konkret rəqəmin göstərilməsi özlüyündə nailiyyətdir. Çünki ötən il sənəddə yalnız ümumi ifadələr yer almışdı.

Bununla yanaşı, nəşr xatırladır ki, ABŞ-dan əhəmiyyətli maliyyə dəstəyi gözlənilmir. Çünki yeni Amerika administrasiyası Ukraynaya birbaşa maliyyə ayırmağı dayandırıb və bununla açıq şəkildə fəxr edir. Beləliklə, bütün yük faktiki olaraq Avropa ölkələri və Kanadanın üzərinə düşür. Yardım məbləğinin ilk dəfə dollarla deyil, avro ilə göstərilməsi də bunun simvolik sübutudur.

Məlumata görə, cari il üçün nəzərdə tutulan 70 milyard avronun 30 milyardını Avropa Birliyinin kredit proqramı təmin edəcək, daha 40 milyard avronu isə NATO müttəfiqləri təqdim etməlidirlər.

Bununla belə, bu öhdəliklərin yerinə yetirilməsi ilə bağlı hələ tam mənzərə yoxdur. Məqalədə deyilir ki, Alyansın qərargahındakı bəzi diplomatlar maksimum şəffaflığın tərəfdarıdırlar ki, vədlərindən geri qalan ölkələrə qarşı “adını çək və utandır” prinsipindən istifadə etmək mümkün olsun.