Avropa Birliyi İranın bir sıra hakimlərinə və İrandakı kiber qrupun yüksək vəzifəli şəxsinə yeni sanksiyalar tətbiq edib.

Axar.az xəbər verir ki, bu haqda Avropa Birliyinin xarici siyasət rəhbəri Kaya Kallas X şəbəkəsində yazıb.

Kallas İranda xalqa qarşı repressiyaları diqqətdən kənarda saxlamamağı tövsiyə edib:

“İran xalqına qarşı repressiyalar unudulmamalıdır. Dünyanın diqqəti Yaxın Şərqdəki müharibəyə yönəlsə də, İran hökuməti tərəfindən İran xalqına qarşı repressiyaları nəzərdən qaçırmamalıyıq”.

O, sanksiyalara məruz qalan şəxslərin insan hüquqlarını pozmaqda və informasiyanın sərbəst axınını boğmaqda rol oynadıqlarını bildirib.

Kallas qeyd edib ki, yeni məhdudlaşdırıcı tədbirlərə siyasi müxaliflərin və dini azlıqların təqibi də daxil olmaqla, ciddi insan hüquqları pozuntularına görə məsuliyyət daşıyan hakimlər daxildir.

Kalasın sözlərinə görə, həmçinin İran hökumətinin informasiya axınını boğması üçün əsas yaradan kiber qrupun əhəmiyyətli şəxslərindən birinin adı da siyahıya daxil edilib.

AB rəsmisi vurğulayıb ki, Tehran daxili təzyiqlərini gücləndirsə də, AB bu hərəkətlərdə rol oynayanları məsuliyyətə cəlb etməyə davam edəcək.

Kallas sanksiya tətbiq edilən şəxslərin adlarını çəkməyib.