Qondarma “Dağlıq Qarabağ ordusu”nda hərbi hissələrindən birinin keçmiş komandir müavini olmuş polkovnik Edik Maloyanın barəsində seçilmiş həbs qətimkan tədbiri dəyişdirilib. O, ev dustaqlığına buraxılıb.

Axar.az Teleqraf-a istinadla xəbər verir ki, Edik Maloyana qarşı Ermənistan Cinayət Məcəlləsinin 426-cı maddəsinin 1-ci hissəsi (dövlət sirri təşkil edən məlumatlara qanunsuz şəkildə çıxış əldə etmiş şəxs tərəfindən həmin məlumatların açıqlanması), həmçinin 46-427-ci maddəsinin 1-ci hissəsi (dövlət sirri təşkil edən məlumatların açıqlanmasına təhrik etmə) ilə ictimai cinayət təqibi başlanıb.

Erməni KİV-lərinin məlumatına görə, Edik Maloyan eyni zamanda müxcalif Güclü Ermənistan Partiyasının tərəfdarıdır.

Edik Maloyan uzun illər Qarabağda Xocavənd rayonu istiqamətində Azərbaycana qarşı döyüşən hərbi hissədə xidmət edib. 2020-ci ildən sonra qondarma "Dağlıq Qarabağ" rejimində "milli təhlükəsizlik xidməti"ndə xüsusi təyinatlı "idarə" yaradıldıqda, həmin qurumun rəis müavini təyin olunub.

O, 2016-cı ilin aprel döyüşlərində, 44 günlük müharibədə və 2023-cü ildəki antiterror əməliyyatlarında Azərbaycana qarşı döyüşüb.