2016-cı il bitmədən Avropa Birliyi Türkiyə vətəndaşları üçün sadələşdirilmiş viza rejimini tətbiq etməlidir. Əks halda, Türkiyə hökuməti miqrant razılaşmasının üzərinə düşən öhdəliklərini ləğv edə bilər.

Axar.az xəbər verir ki, bunu Türkiyənin Avropa Birliyi işləri üzrə naziri və müşaviri Ömər Çelik "Röyter"ə açıqlamasında deyib.

"Brüssel Türkiyə konstitusiyasında terrorla mübarizə ilə bağlı olan maddələrdə dəyişiklik edilməsini tələb edib. Fikrimcə, bu istək sadələşdirilmiş viza rejiminin önündəki ən böyük maneədir. Biz onların verdikləri sözü tutmadığını düşünürük. Belə olan halda, miqrant razılaşmasının üzərimizə düşən öhdəliklərini yerinə yetirməyəcəyik və lazım gələrsə, müqavilədən imtina edəcəyik", - nazir bildirib.

Qeyd edək ki, tərəflər arasında əldə edilən razılaşmaya görə, Avropaya axın edən miqrantların Türkiyədə yerləşdirilməsi qarşılığında Avropa Birliyi rəsmi Ankaraya 3 milyard avro həcmində yardım etməli idi. Bundan əlavə, razılaşmada AB-nin Türkiyə vətəndaşları üçün sadələşdirilmiş viza rejimini tətbiq etməsi də nəzərdə tutulmuşdu.

Lakin Avropa bu şərtlərdən hələ ki, heç birini yerinə yetirməyib.