Keçmiş illərdə də İran prezidentləri BMT Baş Assambleyasının liderlərin iştirak etdiyi yüksək səviyyəli həftəsinə gedə bilirdilər, onlara viza verilirdi. Lakin indi İran və ABŞ müharibə şəraitindədir. Bu baxımdan İran rəsmilərinə vizanın verilməsi sıradan hadisə deyil. Bu, Vaşinqtonun hiyləgər bir gedişidir.

Bu sözləri Axar.az-a açıqlamasında politoloq Elxan Şahinoğlu ABŞ-ın İran Prezidenti Məsud Pezeşkian və xarici işləri naziri Abbas Arakçıya viza verməsi barədə danışarkən deyib.

Onun sözlərinə görə, indi İranda əsas söz sahibləri SEPAH generallarıdır:

“Açıq demək lazımdır, İran prezidentinin səlahiyyətləri yüksək deyil. Amma İran prezidenti sülhə və əməkdaşlığa çalışır, məsələlərin danışıqlar yolu ilə həllini istəyir. Amerika da bunu istəyir.

Pezeşkiana viza verilməsinə bir neçə səbəb ola bilər. İmkan verirlər ki, İranda daha yumşaq siyasətin tərəfdarları gəlib öz fikirlərini BMT-də bildirsinlər və müzakirələrdə iştirak etsinlər”.

Politoloq ABŞ Prezidenti Donald Trampla Pezeşkianın görüş ehtimalını yüksək qiymətləndirməyib:

“Baxmayaraq ki, Tramp Pezeşkianla görüşə biləcəyini deyib, mən yenə bunu ehtimal etmirəm. Məsələ burasındadır ki, Pezeşkian Trampla görüşsə, İranda çox sərt tənqidlə qarşılaşacaq”.