İranın cənubunda yerləşən Əsəluyə şəhərində yanacaq çənlərinə və enerji obyektlərinə endirilən zərbələr nəticəsində atmosferə təxminən 4,7 min ton üzvi birləşmə atılıb.

Axar.az xəbər verir ki, bunu İranın Ətraf Mühitin Mühafizəsi Təşkilatının rəhbəri Şina Ənsari deyib.

“Enerji infrastrukturuna endirilən zərbələr nəticəsində atmosferə yayılan çirkləndirici maddələrin həcmi o qədər böyük olub ki, Tehranda şəhərin təxliyəsini tələb edə biləcək vəziyyət yarana bilərdi. Lakin atmosferin sərhəd qatının böyük hündürlükdə yerləşməsi sayəsində çirkləndirici maddələrin əsas hissəsi İran paytaxtında yer səthinə yaxın hava qatına çatmayıb.

Hücumlar nəticəsində atmosferə 1,5 milyon ton karbon qazına ekvivalent həcmdə istixana qazları da buraxılıb”, - o bildirib.

Qeyd edək ki, martın 18-də İsrail qüvvələri İranın cənubunda yerləşən Cənubi Pars qaz yatağının qaz obyektlərinə və Əsəluyədəki sənaye infrastrukturuna zərbələr endirib. Aprel ayında isə həmin ərazidəki neft-kimya müəssisələri yenidən hücumlara məruz qalıb.