Rusiyanın məşhur politoloqu Aleksandr Duqin bu gün Türkiyəyə səfər edəcək.

Axar.az xəbər verir ki, bu barədə informasiyanı Türkiyə mətbuatı yayıb. Duqin Ankarada parlamentin tərkibində yaradılan Çevriliş Cəhdini Araşdırma Komissiyasında çıxış edəcək.

Qeyd edək ki, Türkiyə mətbuatı bundan öncə məhz Duqinin 15 iyul çevriliş cəhdini hadisə baş verməzdən bir gün öncə xəbər verməsi informasiyanı tirajlayıb.

Rusiyanın ultrasağçı politoloqu olan Duqin Moskvanın avrasiyaçılıq siyasətinin əsas müəllifləri sırasında yer alır. Duqinin adı həmçinin Ukraynada yaradılması planlaşdırılan Novorossiya (Donetsk və Luqansk bunun tərkibində yer almalı idi, lakin sonradan bu plan ləğv edildi – red.) adlı dövlətin əsas təşəbbüskarları sırasında çəkilir. Panslavyanizmin əsas müdafiçəsi olan Duqin keçmiş Rusiya İmperiyasının sərhədlərinin bərpa olunmasını istəyir. 2008-ci ildə Rusiya Gürcüstana müdaxilə edəndə o, hakimiyyəti müharibəni sona qədər davam etdirməməkdə ittiham edib. Ukrayna mətbuatı onu Putinin məxfi məsləhətçisi adlandırır.

Duqinin Azərbaycana qarşı da həddən artıq sərt çıxışları olub. O, Azərbaycanın istənilən yolla Avrasiya İttifaqına cəlb edilməsinin əsas müdafiəçilərindən biridir.