15:46

Qara dəniz üzərində qəzaya uğrayan Tu-154 təyyarəsinin tapılan “qara qutusu”ndan biri ekspertlər tərəfindən oxunub. Rusiya Müdafiə Nazirliyindən bildirilib ki, təyyarə qanadlarında olan problemə görə idarəetməni itirib və hücum bucağı vəziyyətinə keçib.

Axar.az xəbər verir ki, pilotların kabinəsində gedən danışığın bəzi detalları açıqlanıb.

Danışıqlardan aydın olur ki, vəziyyət ekipaj üzvləri üçün gözlənilməz olub. İlk saniyələrdə hər iki pilot çaşqınlıqla üzləşsə də, sonradan özlərini ələ alaraq son ana qədər təyyarəni xilas etməyə cəhd göstərib.

Pilotlar arasında həmin an baş verən danışıqların bəzisini təqdim edirik:

- ...Sürət 300...

- (Anlaşılmır)

- Komandir, tarazlığı düzəltdim.

- (Anlaşılmır)

- (Söyür)

(Kəskin siqnal səsi gəlir)

- Qanadlar... (söyür)

- Yüksəklikölçən!..

- Biz...(Anlaşılmır)

(Yerə təhlükəli yaxınlaşmanı bildirən siqnal səsi gəlir)

- (Anlaşılmır)

- Komandir, düşürük!

Səs qeydinin sonu.

Qəzanı araşdıran komissiyaya yaxın mənbə “Life.ru”ya bildirib ki, “qara qutu”nun açılması nəticəsində Tu-154-ün qəzaya uğramasından əvvəl hücum bucağı göstəricisi (datçik) işlək vəziyyətdə olub.

“Qara qutu”nun açılması zamanı mütəxəssislər hücum bucağının artması ilə müşayiət olunan xarakterli siqnal səsi eşidiblər. Bu sistem kritik hücum vəziyyətinə avtomatik reaksiya verir”, - mənbə bildirib.

Onun sözlərinə görə, ekipaj üzvlərinin sürət yığan zaman uçuş-enmə mexanizmində problemləri olub:

“Qanad arxacıqları kiçik sürətdə təyyarənin hərəkətini idarə edir. İşlək vəziyyətdə onlar qanadların qaldırıcı gücünü artırır. Qanad arxacıqlarının vəziyyəti həm enmə, həm də uçuş zamanı çox vacibdir. Tu-154-ün nədə problemi yaranıb, heç nə demək mümkün deyil”.

Qeyd edək ki, təyyarə qəzadan düşməzdən öncə dispetçerlə pilotlar arasındakı son danışığın səs yazısı ötən gün yayılmışdı.