İngiltərənin "Qardian" qəzeti maraqlı bir məqalə dərc edib. Məqalədən bəlli olub ki, Suriyaya təkcə müsəlman ölkələrindən deyil, həm də Qərbdən olan insanlar döyüşməyə gedir. Ən qəribəsi də odur ki, bu ölkədəki döyüşlərə qatılmaq istəyən insanlar bir-biri ilə sosial media vasitəsi ilə əlaqə saxlayır və elə bu yazışmalar nəticəsində də döyüşə gedirlər.

"Axar.az" xəbər verir ki, London Universitetinin Beynəlxalq radikallaşma mərkəzinin rəhbəri Peter Naumanın araşdırmasına görə, Suriyadakı döyüşlərdə iştirak etmək istəyənlər sosial media ilə oradakı insanlarla əlaqəyə girib bu ölkəyə yollanırlar.

Qəzet indiyə qədər Suriyada 10 ingilis əsilli döyüşçünün öldüyünü bildirib. Eyni zamanda o da bildirilir ki, indi Suriyada 11 min gəlmə döyüşçü var. Bunlardan 2 min 800-ə yaxını Qərb ölkələrinin, təkcə 400-ü isə İngiltərə vətəndaşıdır.

Xatırladaq ki, Azərbaycan vətəndaşlarının da Suriyada döyüşdüyü haqda məlumatlar var və bu günəcən onlardan bir neçəsinin həyatını itirdiyi haqqında mediada xəbərlər yayılıb.