Çeçenistan Respublikasının rəhbəri Ramzan Kadırov keçirdiyi ənənəvi toplantıda Dağıstan Respublikasının və Xasavyurt şəhər merinin ünvanına kəskin ifadələr səsləndirib.

"Axar.az" xəbər verir ki, Kadırov çıxışında şəhər meri Saqidpaşa Umxanovu cinayətkar adlandırıb, Dağıstan Respublikasının rəhbərliyini isə hadisələri nəzarətdə saxlaya bilməmək üstündə qınayıb.

Qeyd edək ki, Kadırov çıxışında Şimali Qafqazdakı gərgin atmosferin yuvalarından biri kimi məhz Dağıstanın qərbindəki Xasavyurt şəhərini göstərib:

"Diqqətinizə çatdırmaq istəyirəm ki, bütün narkotik maddələrin dövriyyəsi Xasavyurtdan keçir. Hamı bilir ki, şəhər meri Saqidpaşa Umxanov banditdir, cinayətkardır. Ona görə də, bu ərazinin sakinləri cinayət törətməkdə olduqca həvəslidirlər. Görünür, Dağısatan rəhbərliyi hadisələri nəzarətdə saxlaya bilmir. Necə olur ki, bu illər ərzində müharibədən çıxan Çeçenistan milyonlarla sərmayə cəlb etdi, qonşumuzda isə hələ də anarxiya davam edir?"

Xatırladaq ki, bir neçə gün öncə Dağıstan Respublikasının prezidenti Ramazan Abdulatipov Xasavyurtda şəhər meri Saqidpaşa Umxanovla görüşərək, ona bəzi tapşırıqlarını vermişdi. Abdulatipov vurğulamışdı ki, Umxanov olduqca mərd və döyüşkən şəxsdir, ancaq bununla belə, şəhərin iqtisadi vəziyyətinin yaxşılaşdırılması istiqamətində müəyyən addımlar atmalıdır. Öz növbəsində Umxanov Çeçen müharibələri səbəbindən rəhbərlik etdiyi şəhərə sərmayənin cəlb edilməsinin olduqca çətin olduğunu diqqətə çatdırmışdı.

Bu arada bəzi dağıstanlı sosial şəbəkə istifadəçiləri Kadırovun ünvanına sərt ifadələr işlədərək, onu öz işi ilə məşğul olmağa çağırıblar. Əlavə ediblər ki, Kadırovun məqsədi Xasavyurtu Çeçenistana birləşdirməkdir.