İranın xarici siyasəti digər ölkələrin müstəqilliyinə hörmət göstərmək və daxili işlərinə müdaxilə etməmək üzərində qurulub.

Axar.az xəbər verir ki, bu sözləri İran Xarici İşlər Nazirliyinin sözçüsü Bəhram Qasımi Ərəb Dövlətləri Liqasının Sammitində ölkəsinə qarşı səsləndirilən fikirlərə münasibət bildirərkən deyib.

“İranla bağlı söylənilən fikirlər qəbuledilməzdir. Biz hər zaman qonşu dövlətlərlə konstruktiv əlaqələr yürütməyə çalışırıq. Onlar keçmişdə yaşanmış olaylarla baxmayaraq, dostu düşmənlə qarışdırırlar”, - İran rəsmisi bildirib.

Qasımi onu da əlavə edib ki, Birləşmiş Ərəb Əmirliklərinin (BƏƏ) İranın üç adası ilə bağlı iddiası əsassızdır:

“Adalar İrana aiddir və belə də olacaq. Təkrar edilən yalanlar bu tarixi faktı dəyişdirə bilməz”.

Qeyd edək ki, dünən sona çatan sözügedən sammitdə rəsmi Tehranın ərəb ölkələrinin daxili işlərinə müdaxilə etməsinin qəbuledilməz olduğu vurğulanmışdı.